ಪುರಾಣ ಕುತೂಹಲ-ಗರುಡನು ಹೇಗೆ ವಿಷ್ಣುವಿನ ವಾಹನನಾದನು?

ಗರಡನು ವೇಗವಾಗಿ ಹಾರುವ ಬಲಶಾಲಿ ಪಕ್ಷಿ.ಪಕ್ಷಿಗಳ ರಾಜನೆಂದೂ ಖ್ಯಾತವಾಗಿದೆ.ಭಗವಂತನು ಭಕ್ತರು ಕರೆದಾಗ ಬೇಗನೆ ಬರುತ್ತಾನೆ ಎಂದು ವಿಷ್ಣುವಿನ ವಾಹನನಾದ ಗರುಡನ ಸಂಕೇತವಾಗಿದೆ.ಗರುಡನು ಹೇಗೆ ವಿಷ್ಣುವಿನ ವಾಹನನಾದ ಎನ್ನುವುದಕ್ಕೆ ಸ್ವಾರಸ್ಯವಾದ ಒಂದು ಕಥೆಯೂ ಇದೆ.ಇದು,ಮಹಾಭಾರತದ ಆದಿಪರ್ವದಲ್ಲಿ ಬರುವ ಗರುಡನ ಕಥೆಯ ಅಂಗವಾಗಿಯೇ ಬರುತ್ತದೆ.
        ಗರುಡನು ಕಶ್ಯಪ ಮಹರ್ಷಿ ಮತ್ತು ವಿನತೆಯರ ಮಗ.ಕಶ್ಯಪರ ಇನ್ನೊಬ್ಬ ಪತ್ನಿಯಾದ ಕದ್ರುವಿನಿಂದ ವಿನತೆಗೆ ಪಂದ್ಯವೊಂದರಲ್ಲಿ ಸೋಲಾಗಿ ದಾಸ್ಯವುಂಟಾಗಿರಲು,ಗರುಡನು ತನ್ನ ತಾಯಿಯ ದಾಸ್ಯವನ್ನು ಬಿಡಿಸಲು ಕದ್ರುವಿನ ಮಕ್ಕಳಾದ ಸರ್ಪಗಳ ಅಪೇಕ್ಷೆಯಂತೆ,ಅಮೃತವನ್ನು ತರಲು ಸ್ವರ್ಗಲೋಕಕ್ಕೆ ಹೋದನು.ಅಲ್ಲಿ ಸಾಹಸದಿಂದ ಅಮೃತದ ಕೊಡವನ್ನು ತೆಗೆದುಕೊಂಡು ಹಾರುತ್ತಾ ಹಿಂದಿರುಗುತ್ತಿದ್ದಾಗ,ಮಹಾವಿಷ್ಣುವು ಅವನನ್ನು ಕಂಡನು.ಕೈಯಲ್ಲಿ ಅಮೃತವಿದ್ದರೂ ಅದನ್ನು ಒಂದಿಷ್ಟೂ ಸೇವಿಸದ ನಿಸ್ವಾರ್ಥಿಯಾದ ಅವನನ್ನು ನೋಡಿ ಮೆಚ್ಚಿದ ವಿಷ್ಣುವು ಅವನನ್ನು ಕರೆದು ವಿಚಾರಿಸಿ ಅವನಿಗೆ ಒಂದು ವರವನ್ನು ಕೊಡುವೆನೆಂದನು.ಅದಕ್ಕೆ ಗರುಡನು ತನ್ನ ಹುಡುಗತನದಲ್ಲಿ ತಾನು ವಿಷ್ಣುವಿಗಿಂತಲೂ ಎತ್ತರವಿರಬೇಕೆಂದು ಕೇಳಿಕೊಂಡನು.ಆಗ ವಿಷ್ಣುವು ಅವನಿಗೆ ತನ್ನ ಧ್ವಜಸ್ತಂಭದ ಮೇಲೆ ಕೂರಲು ಹೇಳಿದನು.ಅದರಂತೆ ಗರುಡನು ಕೂರಲು,ವಿಷ್ಣುವು,"ನೋಡು!ಈಗ ನನಗಿಂತಲೂ ನೀನೇ ಎತ್ತರವಿದ್ದೀಯೆ!"ಎಂದನು.ಗರುಡನು ಈ ಚಮತ್ಕಾರವನ್ನು ಮರುಮಾತಿಲ್ಲದೆ ಒಪ್ಪಿಕೊಂಡನು.ಅಂದಿನಿಂದ ಗರುಡನು ವಿಷ್ಣುವಿನ ಧ್ವಜವನ್ನು ಅಲಂಕರಿಸಿದನು.ಅನಂತರ,ಗರುಡನು ಪುನಃ ತನ್ನ ಹುಡುಗತನದಲ್ಲಿ ವಿಷ್ಣುವಿಗೆ,"ದೇವ!ನಾನೂ ನಿನಗೊಂದು ವರವನ್ನು ಕೊಡುವೆ!"ಎಂದನು.ಆಗ ವಿಷ್ಣುವು,"ಹಾಗಿದ್ದರೆ ನೀನು ನನ್ನ ವಾಹನನಾಗು!"ಎಂದನು.ಗರುಡನು ಒಪ್ಪಿ,ತನ್ನ ತಾಯಿಯನ್ನು ದಾಸ್ಯದಿಂದ ಬಿಡಿಸಿ ಬರುವೆನೆಂದು ಹೊರಟನು.ಅಂದಿನಿಂದ ಗರುಡನು ವಿಷ್ಣುವಿನ ವಾಹನನಾದನು.